Um okkur.

Viltu að barnið þitt byggi upp sjálfstraust og sjálfsaga, efli einbeitingu sína og læri sjálfsvörn í öruggu og hvetjandi umhverfi? Hjá Mudo sameinum við fjölbreyttar og uppbyggilegar Taekwondo-æfingar þar sem gleði og jákvæð upplifun eru í forgrunni. Um leið leggjum við áherslu á grunngildi Taekwondo, svo sem virðingu, kurteisi, þrautseigju, sjálfsstjórn og ábyrgð. Nemendur læra að setja sér markmið, takast á við áskoranir og eiga góð og uppbyggileg samskipti við aðra – færni sem nýtist þeim jafnt innan æfingasalarins sem í daglegu lífi.

Að stunda Taekwondo felur í sér að þjálfa upp það þrek, sjálfstraust og viljastyrk sem þarf til að sigrast á þeim erfiðleikum sem maður stendur frammi fyrir hverju sinni. Taekwondo felur í sér alla þætti þess sem nefnt er „holl hreyfing“. Gerðar eru styrktar- og liðleikaæfingar fyrir alla vöðva líkamans auk þess sem jafnvægi og samhæfing eru æfð.

Fyrir iðkendur Taekwondo…

Allir sem vilja iðka Taekwondo verða að gera sér grein fyrir því að þeir sjálfir verða að ná árangri í þessari list. Enginn getur gefið þeim hæfileika til að vera góður en með þolinmæði og æfingu geta allir orðið betri.

Ef til vill mætti skilja eitthvað af ofantöldu á þann veg að Taekwondo sé aðeins fyrir sterkbyggt fólk og vel þjálfað. Það væri þó mikill misskilningur, því íþróttin hæfir nánast hverjum sem er óháð aldri og kynferði.

Þjálfunin er miðuð við hæfni hvers og eins og gildir það jafnt um börn sem fullorðna. Auðvitað er það þó svo með Taekwondo eins og aðrar íþróttir að sumir verða afreksmenn en aðrir stunda íþróttina ánægjunnar vegna og sjálfum sér til andlegrar og líkamlegrar uppbyggingar.

Taekwondo eiðurinn.

Ég lofa að halda hinn sanna anda Taekwondo. Að nota aldrei þá tækni sem mér hefur verið kennd gegn neinum, nema til sjálfsvarnar, til varnar fjölskyldunni, til lífsbjörgunar eða þegar mér ber að sinna lögum og reglum þjóðfélagsins.

Sigursteinn Snorrason

Sigursteinn Snorrason yfirkennari  er stofnandi Mudo. Hann hefur yfir 27 ára reynslu af kennslu, meðal annars í taekwondo, grunnskólum og háskólum, auk þjálfunar í fjölbreyttum íþróttagreinum. Hann hefur þjálfað iðkendur á öllum aldri og getustigum – allt frá tveggja ára byrjendum til keppenda á Ólympíuleikum, jafnt stúlkur sem drengi.

Sigursteinn er menntaður íþróttakennari og varð árið 2002 fyrstur Norðurlandabúa til að öðlast alþjóðleg meistararéttindi í taekwondo frá KTA. Hann hefur kennt og haldið námskeið víða um heim, meðal annars í Bandaríkjunum, Mexíkó, Kóreu, Sviss, Króatíu og á Norðurlöndunum.

Sigursteinn kynntist bardagaíþróttum 16 ára gamall og flutti aðeins 19 ára til Kóreu til að æfa og nema taekwondo. Þar æfði hann með fremstu taekwondo-iðkendum heims, fimm til sex klukkustundir á dag, við krefjandi aðstæður þar sem hitastigið sveiflaðist frá 40 stiga hita niður í 5 stiga frost.

Á löngum og farsælum kennsluferli hefur Sigursteinn veitt yfir 3.600 iðkendum gula rönd og útskrifað yfir 70 svört belti. Þá hefur hann ferðast til 14 landa til að kenna og halda námskeið – svo aðeins fátt eitt sé nefnt.